वामदेवज्यूलाई भेट्न आवश्यकतै छैन, नभेटेकै होः रमेश खरेल

‘वामदेवको कस्तो स्तर, कस्तो अपेक्षा !’

  रमेश खरेल  र वामदेव गौतम

एमाले संसदीय दल निर्वाचन र कांग्रेस–एमाले सत्ता बाँडफाँटमा ‘किङमेकर’ वामदेव गौतमले फागुन १३ गते उपप्रधानमन्त्रीसँगै गृह मन्त्रालयको पनि सपथ खाए।

रोजेरै ह्याट्रिक हानेको मन्त्रालयमा बहाली गर्न राती नौ बजे गौतम सिंहदरबार पुगे। उनलाई स्वागत गर्न निजामति, प्रहरी, सशस्त्र प्रहरी, गुप्तचरका हाकिमहरु फूलको गुच्छा लिएर लाम लागेका थिए।    गृह मन्त्रालय र प्रहरी वलमा चिरपरिचित गौतमले दिएको वहाली भाषण त्यो भीडका लागि ‘आश्चर्यजनक’ खालको थियो।‘अघिल्लो दुईपटक गृह मन्त्रालय सम्हाल्दा लागेको अनुचित आरोपबाट मुक्ति पाउने गरि म यसपाला काम गर्छु,’ उनले भने।  अघिल्ला पटकमा आफूलाई जबर्जस्ती विवादमा तान्ने कोशिस भएको दाबी गर्दै यो कार्यकाल सबै किसिमका आरोप मिथ्या सावित गराउने घोषणा गरे।‘मेरो यो कार्यकालमा भ्रष्टाचार विरुद्ध शून्य सहनशीलता हुनेछ,’ गौतमले भने, ‘अपराध नियन्त्रणका लागि आजैदेखि काठमाडौं उपत्यकाबाट विशेष अभियान थाल्न म निर्देशन दिन्छु।’  वामदेव गौतम गृहमन्त्री भएको सुन्नेबित्तिकै गुण्डा, लफङ्गा, चोर र लुटेराको सातो जानु पर्ने उनले बताए।‘मेरै पार्टीका कोही परे भने पनि कत्ति नहिच्काई पक्राउ गर्नु र कानुनी कारबाही थाल्नु,’ गौतमले निर्देशन दिए। ‘नेताहरुकाहाँ नधाउनु र मेरो चाकरीमा नआउनू,’ गौतमले यो पनि भन्न भ्याए, ‘त्यस्तो गरेको थाहा भयो भो मूल्याङ्कनमा पछि पर्नुहुन्छ।’कुनै पनि हाकिमले अब आइन्दा साना प्रहरीलाई ‘तँ’ नभन्नु कम्तीमा ‘तिमी’ भनेकै हुनुपर्ने निर्देशन पनि उनले दिए।लामो राजनीतिक जीवनबाट खारिएका गौतम यसपाला ‘साँच्चिकै’ फेरिन खोजेको विश्वास दिलाउन जोडबल गरिरहेका थिए।

समकालीन राजनीतिको शक्तिशाली पात्र गल्तीको पश्चाताप गरेर सुध्रन खोज्नु सुखद थियो। गौतम जस्तो अनुभवी र निर्णय क्षमता भएको नेता सुध्रिए भने शासनप्रशासनमा योगदान नै हुन्थ्यो, उनले शंकाको सुविधा पाए। सबैभन्दा चुनौतीपूर्ण मन्त्रालयको तातो कुर्सीमा आसिन भएको त्रिचालिस दिनमै उनको मूल्यांकन गर्ने बेला भएको छैन। यसबीचमा प्रहरी, प्रशासन साविकझैं चलिरहेकै छ।

गौतमको ‘निष्ठा’ मजबुत भएको जनाउ दिनेगरी फेरबदल भएको जानकारीमा आएको छैन । जनपद, सशस्त्र प्रहरी, सिडिओ कार्यालय र अध्यागमन कार्यालयको दैलोमा पुगेका आम सर्वसाधरणले गौतमले पहिलो दिन बाचा गरेजस्तो ‘सुधारको सुगन्ध’ फेला पारेका छैनन् । हिजो ९ शनिवारदेखि काभ्रेको धुलिखेलमा युवा संघको विस्तारित बैठक बसिरहेको छ । अस्ति साँझसम्म वामदेव जाने कार्यक्रम थिएन । पार्टी अधिवेशनमा युवा परिचालनको महत्व बुझेका गौतम जान मन गरे । आयोजकहरुले चाँजो मिलाइदिए । काभ्रेका अगुवा पत्रकार मधुसुदन गुरागाईँले दिएको जानकारी अनुसार गौतमलाई कुरेर कार्यक्रम केही घन्टा ढिला पनि भयो।

कतिपय सन्दर्भमा प्रहरी र युवा संघको सम्वन्ध तनावबाट गुज्रेको हुन्छ । अदर्श प्रहरीले जे जे सुधार गर्न खोज्छ त्यसम दलका युवा दस्ताहरु यदाकदा अवरोध बन्न खोजेका हुन्छन् । त्यसैले पनि प्रहरी, प्रशासनको नेतृत्व गरिरहेका गौतमको युवा संघको कार्यक्रममा उपस्थिति अर्थपूर्ण हुने नै भयो । आफ्ना पार्टीको युवा दस्ताका लगभग पचहत्तरै जिल्लाका कार्यकर्ताको कुरा सुन्न र सुनाउन पाउनु एउटा अवसर नै थियो ।

गौतमले त्यसको भरपुर उपयोग गरे, काठमाडौंका एसएसपी रमेश खरेलको प्रसङ्ग निस्कियो । युवा संघका नेता खरेलसँग आगो भएका रहेछन् । संघका केन्द्रीय सदस्य अमित लामा पक्राउबारे त्यहाँ गौतमलाई पोल लगाए । आफ्नो बोल्ने पालोमा उपप्रधान तथा गृहमन्त्री गौतम खरेलविरुद्ध खनिन थालिाहाले । उनले खरेलविरुद्धको भएभरको भडास पोखे, ‘सिंहदरबारको मन्त्रालय र ललितपुरको मन्त्री क्वार्टर त्यति टाढा छैन, तर काठमाडौंका एसएसपी आजसम्म मलाई भेट्न आएको छैन । उसले मलाई भेट्दा स्वाभिमान गिर्छ भन्ने ठाने होलान् ।’ आफूले खरेललाई अहिलेसम्म नदेखेको बताउँदै गौतमले भने, ‘कुनै कार्यक्रममा समूहमा आएर सलाम गरेको भए थाहा भएन ।’ गौतमको अभिव्यक्तिले युवा संघका केन्द्र, जिल्ला पदाधिकारी र कार्यक्रममा उपस्थित एमाले सांसद् तथा नेतारकार्यकर्ताहरु दंग परे । धुलिखेल तालिम केन्द्रको उक्त कार्यक्रममा उपस्थित पत्रकारहरुलाई गौतमको त्यस्तो भनाइ ‘अशोभनीय’ लाग्यो ।

‘देशभरका युवा संघका कार्यकर्तालाई विभागीय मन्त्रीले उचालेको देख्दा खल्लो लाग्यो,’ अनुभवी पत्रकार गुरागाईँले भने, ‘त्यो पनि आफूभन्दा पाँच तह मुनिको कर्मचारीविरुद्व।’  धुलिखेलको अभिव्यक्तिमा गौतमले आफ्नो मनका कुरा खोलेका छन् । गलाभरि फूलमाला लगाएर ४२ दिनअघि गृह मन्त्रालयमा उनले दिएका आदर्श बचन र उनको चिन्तनमा कति ठूलो खाडल छ भन्ने प्रष्ट पारिदिएका छन् ।  गौतम प्रष्ट वक्ता छन् र त जुनसुकै प्रकरणमा धेरै दिनसम्म ढोङ गरिहरन सक्दैनन् । यसपाला पनि सपथ गरेको दिन लगाएको आदर्शको मुखुण्डो धुलिखेल गएर फ्याँकिदिएका छन् ।  गौतमलाई लाग्दो हो उनले त्यतिबेला दिएको ‘क्रान्तीकारी’ वहाली भाषण लोकले बिर्सिसक्यो । प्रहरीका हाकिमलाई मातहतका कर्मचारीलाई ‘तँ’ नभन्न निर्देशन दिएका गौतम आफैले भने त्यो सुधारको मन्त्रको हेक्का राख्न सकेनन् । धुलिखेलमा उनले खरेलका बारे सार्वजनिक अभिव्यक्ति दिँदा ‘तिमी’ वा ‘तँपाई’ को आदरार्थी शव्द प्रयोग गर्न जरुरी ठानेनन् । यसलाई सामान्य कमजोरी मान्ने हो भनेपनि उनको व्यक्तित्वमा ‘सामन्तवादी’ सोँच जकेडिएको देखाएको छ । खरेल अहिलेसम्म भेट्न आएनन् भन्ने आक्रोश त्यसकै ज्वलन्त उदाहरण हो ।एमाले कार्यकर्ताका हकमा प्रहरीरप्रशासन अरुभन्दा नरम हुनुपर्ने गौतमको मान्यता पनि प्रकट भयो । आफ् मातहतका प्रहरी अधिकृतविरुद्ध अभिव्यक्ति दिएर गौतमले खरेलको व्यक्तित्व झन् ‘अग्लो’ बनाइदिएका छन् । गृहमन्त्रीको रोष संचार माध्यममा आएपछि सामाजिक सञ्जालमा गौतमको आलोचना भइरहेको छ । ‘गृहमन्त्रीले एसएसपीको रिस गर्ने रु सार्वजनिक रुपमा निन्दा गर्ने रु त्यो पनि भेट्न आएन भनेर रु कस्तो स्तर, कस्तो अपेक्षा १’ पूर्व मन्त्री निलाम्बर आचार्यले लेखेका छन् । आफू मातहत कर्मचारीको गल्ती, कमजोरी देखियो भने नसिहत वा सजाय दिने अधिकार गृहमन्त्रीलाई  छ । प्रहरी अधिकृतहरुमध्ये धेरै वाहवाही पाइरहेका खरेलमाथि उनले पुरापुर निगरानी राख्न पाउँछन्, राख्नुपर्छ । एउटा एसएसपीभन्दा धेरै ख्याति कमाउने ‘स्कोप’ गृहमन्त्रीका सामुन्ने हुन्छ । संचारकर्मी रवीन्द्र मिश्रले फेसबुकमार्फत्  गौतमलाई सुझाव दिएका छन्, ‘वामदेवजी, काम नपरी रमेश खरेलले तपाईलाई किन भेट्न आउनुपर्ने बताइदिनुस् न । बरु राम्रो काम गर्नोस् । तपाईलाई पनि सबैले सेलिव्रेटी मान्नेछन् ।’

विभागीय मन्त्रीले गरेको आलोचना खरेलले मिडिया मार्फत् थाहा पाइसकेका छन् । सेतोपाटीले कर गरेपछि उनले त्यसबारे छोटो प्रतिक्रिया दिन माने । ‘फोर्समा चेन अफ कमाण्ड हुन्छ,’ खेरेलले भने, ‘त्यसको मेन्टेन भएन भने प्रहरी बिग्रन्छ भन्ने मैले बुझेको छु ।’ फूलको गुच्छा बोकेर हाकिम, मन्त्री र नेताको घरघर धाउने प्रवृत्तिले नै प्रहरी बिग्रिएको बताउँदै खरेलले भने, ‘म वामदेव गौतमज्यू मात्र हैन कुनै गृहमन्त्री भेट्न गएको छैन, जाँदा पनि जान्न ।’ कानुनले दिएको अधिकार र बैधानिक आदेश अनुसार काम गर्ने बानी भएकाले मन्त्रीकहाँ गइरहनु पर्ने जरुरत नभएको खरेलले बताएका छन् । ‘आफ्नो ऊर्जा र समय ठूलाबडलाई अनुहार देखाउनमै खर्चिनाले व्यवसायिकतामा आघात पुगेको हो,’ खरेलले भने, ‘म त्यसो गर्न सक्दिन ।’ 

कृपया Post पढिसकेपछी आफ्नो सल्ला, सुझाब / टिप्पणी दिन नभुल्नुहोला । तपाईको सल्ला सुझाबले नै हाम्रो जोश जागर मिल्ने छन् र केहि गर्ने हौसला प्राप्त गर्दछौ. । Thank you

1:21:00 PM